ՎիվաՍել-ՄՏՍ–ը մեկնաբանել է ավտոմեքենաների կայանման վճարների թանկացումը
ԵՐԵՎԱՆ, 11 հուլիսի. /ԱՌԿԱ/. ՎիվաՍել-ՄՏՍ ընկերությունը մեկնաբանել է Երևանում ավտոկայանատեղի վճարի ավելացումը։
Հուլիսի սկզբին «Փարկինգ սիթի սերվիս» ՓԲԸ-ն Facebook–յան էջում գրել էր, որ օգոստոսի 1-ից գրեթե 50%–ով թանկացնում է ավտոմեքենաների կայանման վճարները:
«Հարգելի վարորդ, տեղեկացնում ենք, որ 2017 թ.–ի օգոստոսի 1–ից 5045 համարին SMS հաղորդագրության միջոցով ավտոկայանատեղի վճար կատարելիս Ձեր հեռախոսահամարի հաշվից կգանձվի 748 դրամ գումար, որից 500 դրամ ավտոկայանատեղի վճար, 124.6 դրամ միջնորդավճար և 123.4 դրամ ԱԱՀ: Ավտոկայանատեղի վճարը առանց միջնորդավճարի վճարելու համար օգտվեք վճարովի կայանատեղերին կից վճարահաշվարկային տերմինալներից»։
2017 թ.–ի օգոստոսի 1–ից 1045 համարին SMS հաղորդագրության միջոցով ավտոկայանատեղի վճար կատարելիս հեռախոսահամարի հաշվից կգանձվի 149 դրամ գումար, որից 100 դրամ ավտոկայանատեղի վճար, 24.8 դրամ միջնորդավճար և 24.2 դրամ ԱԱՀ:
Ինչպես երեքշաբթի հայտնեցին ՎիվաՍել-ՄՏՍ մամուլի ծառայությունից, ի պատասխան բազմաթիվ հարցումների և հրապարակումների, ընկերությունը տեղեկացնում է, որ կարճ (SMS) հաղորդագրության միջոցով՝ ավտոկայանատեղի համար վճարման ձևերի և գանձվող գումարի դրույքաչափերի սահմանումն ու դրանց փոփոխումն ընկերության իրավասության շրջանակներից դուրս են:
«Ըստ այդմ՝ վերը նշվածի առնչությամբ ընկերությունը որևէ նախաձեռնությամբ հանդես չի եկել: Համապատասխան պայմանագրի հիման վրա ՎիվաՍել-ՄՏՍ-ին վճարվող միջնորդավճարի տոկոսադրույքը մնացել է անփոփոխ»,– նշվում է հաղորդման մեջ։
Միաժամանակ նշվում է, որ ՎիվաՍել-ՄՏՍ-ը, որպես հեռահաղորդակցության ծառայություններ մատոցող ընկերություն, ի թիվս այլ ընկերությունների, իրականացնում է անկանխիկ եղանակով ավտոկայանատեղի համար վճարներ փոխանցելու՝ բացառապես տեխնիկական աջակցության գործառույթ:
ՎիվաՍել-ՄՏՍ-ը («ՄՏՍ Հայաստան» ՓԲԸ) ընկերությունը հայկական շուկայում գործում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին: -0-
Ծանոթացեք լուրերին առաջինն ու քննարկեք դրանք մեր Telegram-ում
13:46 11.07.2017
