ՎիվաՍել-ՄՏՍ –ն ավելի քան 6.9 մլրդ դրամ է ներդրել Հայաստանի մարզերի զարգացման գործում
ԵՐԵՎԱՆ, 30 սեպտեմբերի. /ԱՌԿԱ/. ՎիվաՍել-ՄՏՍ ընկերությունը կորպորատիվ սոցիալական պատասխանատվության ծրագրերի շրջանակում շուրջ 6,9 միլիարդ դրամի ներդրում է իրականացրել Հայաստանում գյուղական համայնքների զարգացման համար, հայտնում է ընկերության մամուլի ծառայությունը:
Հաղորդագրության համաձայն, սոցիալական ներդրումների մի մասն ուղղվել է Սպիտակի երկրաշարժից տուժած Գյումրիի և Վանաձորի 40 ընտանիքների բնակարաններ տրամադրելու, ջրամատակարարման համակարգի կառուցման, մի շարք գյուղերում խմելու ջրի ապահովման, այլընտրանքային էներգիայի ենթակառուցվածքի ստեղծման (արտաքին լուսավորման և ջեռուցման համակարգերի համար), մանկապարտեզներում և դպրոցներում ջեռուցման համակարգի ապահովման, սահմանամերձ գյուղերում պաշտպանիչ պատի կառուցման, մարզային կրթական հաստատությունների և մշակութային օջախների վերանորոգման, հաշմանդամներին օգնության, ուսանողների կրթաթոշակի ապահովման հարցերին և այլն։
ՎիվաՍել-ՄՏՍ–ը Հայաստանի մարզերում ստեղծել է շուրջ 204 կայուն աշխատատեղ՝ մարզային 54 և շարժական 10 սպասարկման կենտրոնների միջոցով:
«Գյուղական համայնքների զարգացումը ենթադրում է գյուղի և քաղաքի, մարզերի և մայրաքաղաքի միջև կյանքի որակի տարբերության կրճատում: Դրան կարևոր է հասնել հատկապես պատերազմից և բնական աղետներից տուժած սահմանամերձ բնակավայրերում: Մենք, որպես ընկերություն և անհատներ, անում ենք հնարավորինը, որ մարզերում բնակվող մեր հայրենակիցները չհուսահատվեն, իրենց չզգան լքված և շարունակեն հավատալ իրենց երեխաների լուսավոր ապագային», – նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
Յիրիկյանն ընդգծել է, որ ՎիվաՍել-ՄՏՍ–ը գործունեության առաջին իսկ տարիներից Կորպորատիվ սոցիալական պատասխանատվությունը որդեգրելով որպես առանցքային ռազմավարական մոտեցում՝ շարունակում է առաջնորդվել այդ սկզբունքներով կարճաժամկետ և երկարաժամկետ ծրագրերի նախագծման և իրականացման հարցում:
Ընդհանուր առմամբ, ՎիվաՍել-ՄՏՍ-ը 23,8 միլիարդ դրամ է հատկացրել Երևանում և Հայաստանի մարզերում՝ ԿՍՊ նախաձեռնությունների իրագործման նպատակով:
VivaCell-MTS (Ղ-Տելեկոմ) ընկերությունը հայկական շուկայում գործում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին:
Միայն 2014 թվականին ընկերությունը 2.045 մլրդ դրամ է հատկացրել սոցիալական ներդրումների իրականացմանը հետևյալ ոլորտներում` կրթություն` 670 մլն դրամ, մշակույթ` 690.8 մլն դրամ, շրջական միջավայրի պահպանում, էկոլոգիական տեղեկատվություն և ուսուցում` 190 մլն դրամ, առողջապահություն` 237.8 մլն դրամ, համայնքների զարգացում` 135 մլն դրամ, սպորտի և առողջ ապրելակերպի խթանում` 121.4 մլն դրամ։
Ընկերության եկամուտը բջջային կապից և մատուցվող այլ ծառայություններից կազմում է ավելի քան 675.4 մլրդ դրամ։ -0-
Ծանոթացեք լուրերին առաջինն ու քննարկեք դրանք մեր Telegram-ում
20:44 30.09.2015