«ՈԶՆԻ 2015» ամենամյա դպրոցական համակարգչային մրցույթը կմեկնարկի մայիսի 15–ին

ԵՐԵՎԱՆ, 14 մայիսի. /ԱՌԿԱ/.  «ՈԶՆԻ 2015» ամենամյա դպրոցական համակարգչային մրցույթը կանցկացվի մայիսի 15–ին և 16–ին Հայ-հնդկական ՏՀՏ գերազանցության կենտրոնում, հայտնում է «Ձեռնարկությունների ինկուբատոր» հիմնադրամի մամուլի ծառայությունը։

Հաղորդագրության համաձայն, «ՈԶՆԻ 2015» մրցույթի նպատակն է բացահայտել աշակերտների համակարգչային կարողություններն ու հմտությունները, հնարավորություն տալ նրանց համակարգչային ծրագրերի միջոցով արտահայտելու իրենց ստեղծագործական մտքերը, ստուգելու սեփական կարողությունները:

Այս տարի մրցույթին մասնակցում են 6-9-րդ դասարանների 328 աշակերտներ Երևանի 28 և ՀՀ մարզերի 53 դպրոցներից:

Վիճակահանության միջոցով մասնակիցները կընտրեն իրենց աշխատանքի թեմաները և սահմանված ժամանակի ընթացքում կներկայացնեն այն: Ամսվա վերջում հայտնի կլինեն հաղթողները, ովքեր կստանան պատվոգրեր և մրցանակներ:

Միջոցառումն անցկացվում է « Ձեռնարկությունների ինկուբատոր» հիմնադրամի օժանդակությամբ Հայ-հնդկական ՏՀՏ գերազանցության կենտրոնի հետ համատեղ։ Տեղեկատվական հովանավորն է` Կրթական տեխնոլոգիաների ազգային կենտրոնը։ -0-

Ծանոթացեք լուրերին առաջինն ու քննարկեք դրանք մեր Telegram-ում

21:06 14.05.2015