«Web Ծիրան» IV փառատոնի հաղթող է դարձել «Աղջիկը լուսնի վրա» ֆիլմը
ԵՐԵՎԱՆ, 1 ապրիլի. /ԱՌԿԱ/. «WEB ԾԻՐԱՆ» 4-րդ համահայկական առցանց կինոփառատոնի հաղթող է դարձել «Աղջիկը լուսնի վրա» ֆիլմը, հայտնում է VivaCell-MTS ընկերության մամուլի ծառայությունը։
«Ժյուրիի որոշմամբ` գլխավոր մրցանակը շնորհվել է ռեժիսոր Արեն Մալաքյանի «Աղջիկը լուսնի վրա» ֆիլմին։ Ժապավենի օպերատորը Մարտին Հովհաննիսյանն է, իսկ պրոդյուսերը՝ Էդգար Բաղդասարյանը: Մրցանակը կազմել է 400 հազ. ՀՀ դրամ»,– նշվում է հաղորդագրության մեջ։
Չորրորդ «WEB ԾԻՐԱՆ»-ը մեկնարկել էր փետրվարի 26-ին: Դրա արդյունքներն ամփոփվեցին մարտի 26-ին՝ մեկ ամիս շարունակ դիտելով webtv.am մշակութային ինտերնետ հեռուստատեսության Youtube-ի պաշտոնական ալիքում տեղադրված 42 ֆիլմերը: Ամսվա ընթացքում առցանց կինոփառատոնի ֆիլմերն ունեցել են 23 000 դիտում։
««WEB ԾԻՐԱՆ» համահայկական օնլայն կինոփառատոնը եզակի հնարավորություն է ընձեռում սկսնակ կինոգործիչներին ցուցադրելու իրենց տաղանդը, գրավելու հանրության, ինչպես նաև ֆիլմարտադրողների ուշադրությունը և հետաքրքրությունը իրենց ստեղծագործությունների հանդեպ` ունենալով ինտերնետի հնարավորությունները որպես հիմնական գործիք»,- նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
«Web Ծիրան» փառատոնի կազմակերպիչներն են «Ոսկե ծիրան» Երևանի միջազգային կինոփառատոնը և webtv.am հայկական մշակութային ինտերնետ հեռուստատեսությունը։ Փառատոնի գլխավոր գործընկերն է Հայաստանի հեռահաղորդակցության առաջատար օպերատոր ՎիվաՍել-ՄՏՍ-ը: «Web Ծիրան» առաջին փառատոնն անցկացվել է 2011 թվականի նոյեմբերի 15–ից դեկտեմբերի 25–ը։ -0-
Ծանոթացեք լուրերին առաջինն ու քննարկեք դրանք մեր Telegram-ում
19:53 01.04.2015