Ղրիմում գործարկվել է առաջին ռուսական բջջային ցանցը

ԵՐԵՎԱՆ, 5 օգոստոսի. /ԱՌԿԱ/. Ղրիմում սկսել է աշխատել «Կ–Տելեկոմ» առաջին ռուսական բջջային կապը, Cnews–ին են հայտնել Հաղորդակցության և կապի նախարարությունից։

Ղրիմում վարչապետ Դմիտրի Մեդվեդևի գլխավորությամբ կապի զարգացման հարցերով տեսակոնֆերանս-խորհրդակցության ժամանակ Ղրիմում գտնվող հաղորդակցության և կապի նախարար Նիկոլայ Նիկիֆորովը թույլտվություն է խնդրել միացնել ցանցն օնլայն ռեժիմով, ինչից հետո «Կ–Տելեկոմը» սկսել է աշխատանքը։

Ինչպես հայտնում է Հաղորդակցության և կապի նախարարությունը, գործարկված կոմուտատորը ռուսական բջջային օպերատորի ցանցի միջուկն է, որի ծածկույթն ապահովում են 1.5 հազար բազային կայաններ։ Ինչպես ակնկալվում է, 2014 թվականի օգոստոսի 5–ի առավոտյան ցանցը կգործի Սիմֆերոպոլի ողջ տարածքում, իսկ 48 ժամի ընթացքում այն կծածկի ամբողջ թերակղզին, հաղորդում է cnews.ru–ն։

Վերջին ամիսներին Ղրիմում կապի նոր ենթակառուցվածքի ինտենսիվ շինարարություն էր ընթանում, իսկ 2014 թվականի հունիսից թերակղզում սկսվել է «+7» համարակալմամբ ռուսական սիմ–քարտերի զանգվածային վաճառք։ Ներկայում արդեն վաճառվել է շուրջ 800 հազար այդպիսի քարտ, իսկ ընդհանուր պաշարը կազմում է մոտ 1.2 մլն հատ։

Նիկոլայ Նիկիֆորովի խոսքով` առաջիկայում ակնկալվում է նաև այլ օպերատորների ցանցերի գործարկում Ղրիմում։ 2014 թվականի օգոստոսին կգործարկվեն երրորդ և չորրորդ սերնդի կապի ցանցեր։

Ինչպես հայտնում է «Ինտերֆաքսը», Ղրիմի նոր օպերատորն աշխատում է 978 DEF-կոդով։ Ռուսական սիմ–քարտերը միանում են նոր ցանցին ավտոմատ կերպով։ Ռոումինգում մեխանիկորեն ցանցին միանալու համար հեռախոսի կարգավորումներում պետք է ընտրել ցանցի «250-32», «Win Mobile» կամ «Rus 32» կոդը։ -0-

Ծանոթացեք լուրերին առաջինն ու քննարկեք դրանք մեր Telegram-ում

15:37 05.08.2014